Hi Pag-ong boy hi Bake`.

Ma-in kowinto ya tongkol koni Pag-ong boy koni Bake`
ya mita-amigo. 
Mihay allo, nako hila nagpasyal.
Ha kapapasyal la, nakatompak hilan mihay hangi` nin 
ha-a ya natomba. 
"Amigo," wani Bake`, "maganday kalma` ta. 
"Itanem ta bayti ya hangi` nin ha-a emen ta ma-in 
nin ma-ekan no mamonga." 
"Awo`, amigo," wanan Bake`. 
"Piro," wani Pag-ong, "ka-ilangan pariho tan mananem. 
"Kaya`, amigo, potohen ta bayti ya hangi` ta mamili` 
ka no anyay labay mon itanem, no po-on o tampoh." 

Bana` ta habayti hi Bake` ay ma-agap boy
ma-in kalokowan, pinili` nay tampoh ta angkakit na ya 
maganda bana` ta hay bolong ay hariwa` et. 
Pangayari` hilan nipotoh ay nakoynan parihon nangitanem.
Mikarayo` hilan pinanamnan.

Nalabay ongnoy allo, hay intanem nin pag-ong 
ay malhay ana boy maraninan mamoso`. 
Hatoy intanem ni Bake` ay nalaney ana bana` ta ayin yamot.
Pirmin pitibawtibaw ni Pag-ong ya ha-a na. 
Mihay allo ba-in, nakit na ya ma-in anan bonga ya ha-a na. 
Nako yan nagpasyal koni Bake`. 
"Amigo," wana, "komostay ha-a mo?" 
"Nati na, amigo," wani Bake`. 
"Hapay tanem mo, tinomobo`?" 
"Awo`, amigo, ma-in anan bonga." 

Kaparahan istorya, nawoto` anay ha-a ni Pag-ong. 
Bana` ta agya ka-oli`, na-ihipan nan lakwen hi amigo
nan Bake` ta hiyay pa-oli-en biha mi-atag hilayna ha bonga. 
hi Bake` ta hiyay pa-oli-en biha mi-atag hilayna ha bokal. 
Panlomateng na bayro ha amigo na, "Anyay anggaw-en 
mo hapa-eg?" wana. 
"Ayin, amigo," wanan tinombay hi Bake`. 
"Nako kori, amigo," wana ni Pag-ong, "bana` ta hay ha-a ko 
ay nawoto` ana boy agno maka-oli`; kaya` no labay mo, hika ya moli` ta 
pi-atagan tayna ya bonga." 
"Habaytoyna naying awod, amigo. 
"Mako tayna," wani Bake`. 

Panlomateng la do ay nakit layna baman ya talagan nawoto` 
anay ha-a. 
Bana` ta hay Bake` ay mahiba` ha ha-a, pamakakit na, noli` 
ana ba-in ta ompisaynay pamangan. 
"Tatawan mo ko paraw, amigo," wani Pag-ong. 
"Agka pon, amigo, ta antimantimanen ko," wani Bake`. 
Tebe kikwa ba-in hi Pag-ong, ombayroy halita-en ni Bake` 
anggan hin marani naynan mapigitna`. 

Hapa-eg, hay pahang ana ni Pag-ong; kaya` hay ginawa` 
na, nangwa yan dawdowih ta inggawa` na ha mamalibot po-on 
ha-a emen no mona-oy hi Bake` ay madowih ya. 
Pangayari`, nako yan nagtago` ha kolon ongot ya ma-in 
lobot. 
Hin ma-oboyna ba-in ya ha-a, nona-oy ana hi Bake`. 
Panlomateng na ha po-on, nadowih ya. 
Hay pahang na koni Pag-ong. 
"Makit kon bongat," wana, "bayti hi Pag-ong, ma-in 
mangyari kona." 
Piro habayti bale` hi Pag-ong ay ka-ili nan ka-ili. 
Hin nakit ni Bake` bayto ya kolon ongot ya nakapalokob, 
nikno` ya ta an-alihen nay dawdowih ha bitih na boy ha boli` na.
Nakit ba-in ni Pag-ong ya ikoy ni Bake`; kaya` inognat na. 
"Ay," wana ni Bake` ya nalimowan. 
"Hapa-eg," wani Bake`, "ta nakit kata ay tadtaren kata." 
Nakaka-ili hi Pag-ong. 
"No tadtaren mo ko," wana, "sigoradon lomake` ako." 
"Bayowen kata awod," wana. 
"Lalo` ana ingat nin lomake` ako," wani Pag-ong. 
"Ah, tanda` koynay gaw-en ko komo," wana; "po-olan kata." 
"Lalo` koynan ingat labaylabay," wani Pag-ong. 

Hapa-eg, nangihip hi Bake` nin paraan no anyay dapat 
nan gaw-en koni Pag-ong. 
"Pag-ong," wani Bake`, "hapa-eg bale` ay agkayna makalibri.
"Itapon kata ha lanom." 
"Amigo, ahe` kik!" wani Pag-ong. 
"Ingalowan mo ko ta agko tanda` manangoy. 
"Sigoradon mati koynan kik bayto." 
"Ah, ahe` ma-ari`," wani Bake`. 
"Talagan itapon kata ha lanom." 
"Tadtaren mo koyna, amigo. 
"Agmo ko tana itapon ha lanom ta sigoradon ha-anggawan 
koyna bayto." 
"Ahe` ma-ari`," wani Bake`. 
Kinwa nay bitih ni Pag-ong ta intapon na ya ha lanom. 

"Ha! Ha! Ha!" wani Pag-ong. 
"Talagan tangah ka, Bake`," wana. 
"Wari` agmo nayi` tanda` ya bali koy lanom? 
"Amigo kon Bake`. bahen ka tana." 
Habayti hi Bake`, halos agna makwan ihipen ya ginawa` na. 
Nog-alih yan masyadon lele` bana` ta naloko ya ni Pag-ong. 
